Enquête fiscale ordonnée par Charles Quint pour déterminer l'ampleur des ravages occasionnés par les différentes armées en présence. (AN J1016)

"Sur la requeste présentée par les manans & habitans de Thilloy lez Hermaville ont esté oys & examinez Philippe de Gouy, lieutenant, eagié de XXXVI ans, Pierre Petit, labourier, eaigé de XLV ans, & Franchois Rappine, labourier, eaigé de XXXIII ans, le tout ou environ, demourans audit Thilloy. Et requis ce qu'ilz en scavent, dient et déposent par leurs sermens que ledit village est joindant au conté de Saint Pol. A cause de quoy, et durant qu'icelle conté estoit à sauvegarde du Roy de France, les gens de guerre franchois tenans garnison en la ville de Doullens, distant dudit village quatre lieues & trois lieux de Humbercourt, y auroient fait plusieurs et diverses pilleries. En quoy faisant, ilz auroient emmené la pluspart de leurs chevaulx & bestiaulx & bouté le feu en une maison. et après la surprinse de ladite ville de Saint Pol, lesdits habitans furent derechef pillez des gens de guerre franchois y tenans garnison. A cause de quoy, ils auroient estez constraintz habandonner leurs maisons & heritages & eulx absenter dudit village de Thilloy jusques a ce que, au mois de juing de l'an XXXVII, l'armée de l'empereur notre sire se seroit mise au camp pour aller assiger icelle ville de Saint Pol, laquelle armée se seroit assemblée au village d'Aubigny, prochain dudit Thilloy d'une demye lieue , ou elle auroit campé pour trois jours, durant lesquelz votredite gendarmerie auroit mangé, gasté & fourragé plusieurs des ablays desdits habitans, tellement qu'au mois d'aoust dudit an XXXVII, ilz n'auroient seullement despouillé que les deux tierchz. Sy ne auroient lesdits habitans remis sus que une partie  une partie de leurs terres a moictié labourées. Au moyen de quoy, ne auroient despouillé que deux mil garbes de bled où auparavant les guerres ilz en despouilloient douze a quatorze mil. Si ne ont lesdits habitans pour le présent nulle blanches bestes, où auparavant des guerres dernières & en tems de paix ilz pooient avoir six a sept cens blanches bestes. Dient davantage lesdits habitans que la bende monseigneur le comte d'Espinoy avoir assignation en nourriture d'un homme d'arme de la bende auquel ilz delivroient leur avaine & garbées a furnitures des chevaulx, lequel n'a rien payé de furniture de sesdits chevaulx ausdits habitans. A cause desquelles pertes & dommages, iceulx habitans sont demourez en arrieraiges en la somme de XXVII £ivres XIX solz pour plusieurs termes escheuz à la Saint Andrieu dernier passé, laquelle somme iceulx habitans ne sçauroient furnir ne payer, requérans a ceste cause avoir quietance & moderation. Interroguez quelle grace ilz ont eu des commissaires de l'empereur notre sire, auquel appartient la terre dudit Thilloy par droit de confiscation, dient qu'ilz n'ont eu aucune modération ausdits commissaires, saulf que les censives lesdits commissaires en ont quicté ung tierch. Et est sur tout requis ce qu'ilz en sçavent. Ainsi seignez Philippe de Gouy, Pierre Petit & F Rappine. Veu laquelle affirmation, samble aux commissaires que soubz correction de votre Majesté l'on peult bien quiéter la moictié en payant l'aultre moictié comptant".